સુરત શહેરમાં રખડતા કુતરાની વસ્તી વધતી જતી હોવાથી સુરત મહાનગરપાલિકાએ આ સમસ્યા પર કાબૂ મેળવવા માટે એક મહત્વપૂર્ણ પગલું ભર્યું છે. કુતરાની ગણતરી માટે પાલિકાએ અગાઉ પાંચ વખત ટેન્ડર બહાર પાડ્યા હતા, પરંતુ કોઈ એજન્સી મળી ન હતી. હવે છઠ્ઠા પ્રયાસે પાલિકાને એક એજન્સી મળી છે, જેને 9.50 લાખ રૂપિયાનો વર્ક ઓર્ડર આપવામાં આવ્યો છે.
આ એજન્સી આગામી છ મહિનામાં શહેરમાં રખડતા કુતરાની ગણતરી કરશે અને તેમની વસ્તીનો અંદાજ મેળવશે. આ સર્વેક્ષણ દ્વારા પાલિકાને એનિમલ બર્થ કંટ્રોલ (ABC) યોજનાને વધુ અસરકારક બનાવવામાં મદદ મળશે.
ટેન્ડર પ્રક્રિયામાં માત્ર ‘હ્યુમન વર્લ્ડ ફોર એનિમલ્સ ઇન્ડિયા ફાઉન્ડેશન’ નામની એજન્સીએ જ રસ દાખવ્યો હતો. આ એજન્સી શહેરમાં રખડતા કુતરાની ગણતરી અને સંબંધિત સર્વે કામગીરી માટે 9.50 લાખ રૂપિયા લેશે. પાલિકાએ આ ઓફરને મંજૂરી આપીને એજન્સીને વર્ક ઓર્ડર પણ આપી દીધો છે, જેના કારણે લાંબા સમયથી અટવાયેલી કામગીરી ટૂંક સમયમાં શરૂ થવાની શક્યતા છે.
પાલિકાના જણાવ્યા અનુસાર, આ સર્વે છ મહિનામાં પૂર્ણ કરવાનો લક્ષ્યાંક છે, પરંતુ ચોમાસા પહેલાં જ આ કામગીરી પૂરી કરવાનો પ્રયાસ કરવામાં આવશે. સર્વે ટીમ શહેરના દરેક ઝોન અને વોર્ડમાં જઈને રખડતા કુતરાની સંખ્યા વિશે માહિતી એકત્ર કરશે.
આ સર્વેમાં માત્ર કુતરાની કુલ સંખ્યા જ નહીં, પરંતુ અન્ય મહત્વપૂર્ણ માહિતી પણ એકત્ર કરવામાં આવશે, જેમ કે ઝોન અને વોર્ડ મુજબ રખડતા કુતરાની સંખ્યા, નસબંધી કરાયેલા કુતરાની સંખ્યા, ઘાયલ અને બીમાર કુતરાની સંખ્યા અને માનવી-કુતરાની સંખ્યાનો ગુણોત્તર વગેરે.
આ સર્વેના પરિણામોના આધારે પાલિકા ભવિષ્યમાં એનિમલ બર્થ કંટ્રોલ પ્રોગ્રામને વધુ સારી રીતે અમલમાં મૂકી શકશે અને રખડતા કુતરાની સમસ્યાને નિયંત્રિત કરી શકશે.
